Buchstabengetreue Übertragung des Vertragstextes, der Urkunde den Bau des sog. Reitersauer Viehweidsees betreffend. Original-Urkunde im Hauptstaatsarchiv München

Nota, wellcher gestalt die Trüb, unnd Vichwaidt an dem grossen Reutersauer See, ertheilt, mit allen anstossen,

den 6. Juny de Anno 1585.

Durch Abbt Müchaelen ist diser See Anno 1548 erpaudt worden.

Erstlichen so sollen die Pauren im Hinderen Holz, genant Hanns Pear, unnd Hanns Lorj, herab am See gehn Schlauch werz, bis in das Pechlin, ihm Moß genandt das fibar Moß, unnd nit weiter threiben, von dannen megen sye wider hinauff treiben Ehehalb des Pachs, unnd Sees, bis in den Pichelbach, unnd auch nit weiter, da sollen sye wider umb kheren, unnd herab treiben bis an Khürchsteig ihm Pronnenloch, unnd dahin durch schlagen auff das Möslin, unnd yber das Möslin neben den Markhen hinauff an der Schlegelwelzin gehn Schweinsteig bechlin, unnd hiniber yhren besuech an der halden was gehn See hanget bis in die besen Lachen oberhalb des Rechen, wie der Stain ligt, unnd nit weiter herab suechen, unnd haben gehn Schweinsteig, auch in der Eben gehn Reitersau gahr khein thrib, noch besuech..

Item die am Schlauch, Biberschwellen, unnd Prandtstatt, die sollen ihren besuech, wie von altershero über die Siessen Reuten neben dem See, doch enhalb des Pachs, hinauf in Pronnenloch, bis in den Bichelbach, unnd auch nit weiter, doch sollen sie die Vichwaid gegen den Grabneren besuechen wie vohr alters hero.

Item die vordere Hölzerer genandt Hanns Noll, unnd Hais Schwaiger, die sollen herab threiben gehn Loch, bis an vier grosse Pyernbaim gehn Fuhrt , unnd nit weiter, von dannen sollen, unnd mögen sye gehn der Schlagreuthin, wie von alters hero threiben, unnd dise Waidt von Pichel bach bis an die Markh, sollen sye kheines wegs gefahrlicher weis nit spahren, noch einfachen, oder zu einer Khölber Peundt machen.

Als sollen auch sye die vohrgenante under einander Nimmer gahr unnder des Nollen Paum, unnd gassen zu nache threiben, unnd sye die Nollen den Reitersaueren, Staingadneren, auch ihre gassen, unnd zaun frey lassen, unnd gefahrlich nichts gegen einander handlen. Die Unters Rieder mögen in der oberen Vich Waidt, hinab gegen Staingedelin threiben, bis an den Markh bach, den halben Tag, doch megen sye den gannzen Tag gegen einander abwixlen, unnd so sye mit irem Vich hinab khommen, so sollen sye wider mit ihrem Vich umb kheren, unnd die oberen gassen hinein threiben, wie vohr alters hero heraus getriben haben, und herkhommen ist.

Doch sollen die Vichwaiden von allem allein zue ihrem Vichnuz unnd Niessen, unnd khainer die Vichwaiden weder mit Khelber oder anders was sonst zu einer sechen Punitten gehörtt, machen.

Item die Undersrüeder, Staingädler, Reitersauer, sollen herüber an der Sragreütten treiben bis an das bechlen unnd bis über den Besen graben hiniber, an der Schlögl welzin neben khann markhen, wie sye nach einander über das mos stenndt, bis an des Nollins Prunnen zu bunden, in einer Markhthannen ein Zeil, unnd sollen hinfüran weder in Gätter noch Gassen jenshalb der Mark, kein Trüb noch besuech mehr haben.

Actum den 6. Juny Anno 1551